gschicht...

rummle tatt fyffe - die e bitz anderi zyschdigsgrubbe 

2014 - ??

2013 - possy riot - d sujet-findig fir d fasnacht 2013 isch ewäng miehsam gsii. bim znacht noch em säulizumft-umgang im dezämber 2012 hänn mer zwor e baar gueti idee ghaa, aber unsere "delegierte", dr stephi, het denn doch nit a d sujet-sitzig kenne goo und unseri vorschleeg in d diskussioon yybringe. esoo hänn die junge under sich s sujet "pussy riot" definiert, aber mir hänn uns däm nadierlig aagschlosse. als glaini dsp-spezialidäät und reminiszänz an unser "joorhundert-sujet" us em 1998, de strumpf-ueli, hänn mer feschtglegt, dass mir uns punk-sturmkappene mit ueli-hörner baschtle. au hyyr sinn mer laider nit im vollbestand gloffe: unsere major peter het us gsundhaitligem grund am zyschtig kai fasnacht gmacht; immerhin bim znacht isch er denn aber derbyy gsii. losglegt hänn mer am nyyni demoorge in der "harmonie". noch zwai kehr "entre nous" hänn mer die junge droffe und mit iine aimool mee uff dr haslersche dachterrasse s herrlige wätter und dr aint oder ander gin-tonic gnosse. dernoo hänn mer zem was waiss ych wievyylte mool s "déjeuner dansant" vo dr gugge 46 eröffnet. d "reemer" hänn e bitzli grumplet, aber dr "ueli" isch no oordlig gsii, und dorum deerfe (oder miesse…?) mer au näggscht joor wieder uff d casino-bihni go rötze. via lampe-usstellig sinn mer denn scho bald ins glaibasel und hänn deert bim "shipwrecked inn" die blaue bögg zuen eme apéro begriesst. zämme hänn mer e feine kehr zem "adler" gmacht. vor em znacht sinn mer noonemool in unsere käller fir e aperöli mit em peter. mir hänn en denn ins "torstübli" drummlet und deert zem wiederhoolte mool sauguet gässe (peter: merci fir dr wyy!!). d seibi strossebängg sinn verbyy koo, und au wenn mer noch zwai wuche charivari iiri väärs uswändig kennt hänn, sinn si um ainiges luschtiger gsii als d spyyrhind wo speeter au sinn koo singe. no im glaibasel hänn mer die junge wieder droffe und sinn mit ene uff e andreasblatz. deert isch e saubuff gsii, gmietlig goot anders. unseri vordrääbler hausi und philipp hänn scho bald emool abgwungge, und au dr roger und dr schibbe sinn verhältnismässig frieh haim gange. d räscht-dsp isch denn speeter im aagfrässene-käller mit de junge in e heftigs feschtli yynegrutscht (stichwort "bohemian rhapsody"!), und rund 48 stund noch em morgestraich isch e wytere guete dsp-zyschtig z änd gange. (thäggscht: wb)

2012 - vada a bordo cazzo - e ganz e spezielli fasnacht isch es das joor gsii...mir hänn laider im dezämber miessen abschiid näh vom e urgstei vo dr dsp. dr kopf vo villne idee und spinnige süsche. "dr chrigou" isch laider viel z'frieh vo bord und alles riefe "a bordo" hett nüt gnutzt. trotzdäm oder erst rächt hämmer dr zyschdig gnosse und zwar wie no nie. es isch gsi als ebb dr vogt dört oobe mol für oornig gsorgt hett und d'wulgge hett uff d'sytte ruume loh. wohrschiinlig gitts derte jetzt au e dsp! noon em e bsuech am grab vom grischtiaan hett jeede nomoll dief duuregschnuuft und sich denn kopfiiber in d'fasnacht gstirzt. bim gugge-46 uffdritt hämmer wieder emol 's bewährte repertoire mit de iigschwaisste darbotte................. und si wänn is immer no, die geister die ich rief......... wie dr süscheetitel scho sait, hämmer uff jedefall moll e schiff uff d'sytte leege loh und sinn denn mit de youngsters "a bordo" gange. mit apero und dancefloor und e bitzli ballermann, viel azzuro und knallrootes gummiboot, e baar moldawierinne (schöbbeeeee) hämmer dr daag ummebrocht. einzig 's repertoire miesste mr e mol iberdängge, fir as mr 's joor drduur so viel märsch iebe, hämmer relativ weenig kenne zelebriere und d'verschnuufer drummer hänn nid mol kenne bewyysen as si d'celanese und dr drummler glehrt hänn. wo mr denn nomol als dsp ellai underwäggs hän welle e halt am noodlebärg mache hett is fascht dr schlaag droffe, numme zivis und bsoffeni, as me sich als fasnächtler numme no muess apeeble losse und fascht nimm duure kunnt isch nid numme druurig, sondern e schand und e bedriebligen usswuggs wo d'generation "mobile" und " have fun" do zelebriert. villicht isch es an dr zytt in däne dääg mitnander in d'ferie z'raise und die drei scheenschte dääg zum byschpiil uff em e grytzfahrtschiff z'verbringe, oder doch lieber nid. Ich hoff z'mindescht as 's näggst joor wieder scheen wätter isch d'youngsters die märsch doch no lehre und vorallem as mr wieder e tolle zyschdig derfen erlääbe. (thäggscht: js)

2011 - jugo zyygli dr dailwyys mit de junge verschnuufseibianer zämme absolviert zyschtig im joor 2010 het sich bewährt, und me het beschlosse die sach wyterzfiehre. derzue gheert jo au e gmainsam sujet mit entsprächender wahl im "plenum" e baar wuche vor dr fasnacht. an ere sitzig im schnabel het e mehrhait vo de aawääsende s "burka-zyygli" userkoore. noch aimool dryyber schloofe hänn aber die maischte das thema als zue haiss aagluegt. me het befyrchtet dass me am zyschtig kennt aagfiggt wäärde; sälber lyt aafigge aber isch besser, doorum isch s in dr wahl zemänd knapp underläägene sujet nummere zwai zem zuug koo: s "jugo-zyygli". s goschdym respeggtiv e meegligscht "schwuule" drääner het jeede sälber miesse bsoorge; demit's ewäng ainhaitlig ussgseht hänn alli wyss plastiggläärvli und e "tschösser-dächlikappe" bikoo. aagfange hänn mer dr zyschtig am nyyni demoorge mit em obligaate schmäärzbier im schnabel. derbyy gsii isch au scho dr aint oder ander vo de junge. laider pausiere miesse het dr jügge us gsundhaitligen grund. s wätter isch dr hammer gsii und doorum dr apéro uff dr dachterrasse vom lambiel sym brueder in dr freie strooss e bsundere gnuss. mit e baar gin&tonic hänn mer uns warmdrungge fir dr dradizionell uffdritt am "déjeuner dansant". dernoo hänn uns die junge am stainebäärg abghoolt, und ändlig isch dr ganz "jugo-zuug" uff d gass (nai, nit d steffi. und au nit d nadine oder s susi…). dr vordraab het s sujet voll uskoschtet und ummebroleetet wie d wältmaischter, mir hindedraa hänn fascht nimm kenne rötze vor lache - und doodermit e gueti usreed ghaa wenn's noch staiablaade deent het. noch eme halt bi dr lampenusstellig, und eme wytere apéro uff em andreasblatz isch me zem rääbhuus zooge. deert het me sich wieder drennt, denn es isch e dsp-première uff em brogramm gstande: e familie-um-zyygli. mit de kinder vom olli, em sigi und em hausi hänn mer e kehr am rhy entlang gmacht und bin eme halt in dr neechi vom hotel krafft die herrlig friehligssunne gnosse. ybrigens: dr petrus schyynt e jugo z syy, denn är het uns dr ganz zyschtig duure mit hölzli-wätter verwehnt. uff em wääg zem znacht hänn mer bim yysebähnli in dr utegass die junge wieder droffe. gspiise hänn mer dernoo "entre nous" bim lotti im torstybli. es isch sehr gmietlig und fein gsii, doorum gehn mer au im 2012 wieder deert aane. dr schryybend het e dsp-gschängg bikoo uff dr 50. wo er am morgestraich het deerfe fyyre - noonemool merci coupons! zoobe hänn mer zeerscht s glai- und zemänd s groossbasel unsicher gmacht, zämme mit de jung-jugos. nodisnoo isch dr zuug glainer woorde wääge hoggeblyybe oder haimgo (jää schoone fir e mittwuch?!?). zrugg blyybt d erinnerig an e tolle zyschtig - 'schvollkrassgsiimonneejh! (thäggscht: wb)

2010 - aff glygge basel no dr ehnder floppige zwaite ussgoob vom taxi süschee letschti fasi hämmer das joor e neue schritt gwoggt. mr hänn is mit eren andere grubbe zämmedo. nid für dr ganzi daag, das wär däne jungs und mädels nid zue z'muete gsii. uns allerdings au nid. aber e gmainsaam süchee muess halt scho sii. mit aff glygge basel isch eins gfunde worde wo allne grächt worden isch und sogar dsp karakter ka hett. fazit: vuvuzeela isch fascht wie guggemuusig und jede hett könne mehr oder weniger freudele dermit. leider sinn nid alli scho am nyni demorge uss de fädere ko und erscht uff e zwaite halt ygstiige. dr dradizionell uffdritt am gugge 46 ball isch nodürlig en erschte heehepunggt gsi. wie immer aakindet als eini vo de beschte drummelgruppe hämmer e satte uffdritt aanegleggt. vollpaggt mit individuelle kratzerli und rhytmische eigegreazioone. was solls, für näggscht joor simmer scho wieder buecht. derno hämmer wieder unseri - jungi garde - droffen und öbben e stund im stöggli verbrocht. au nid wirgligg e hailait gsii. e baar lutti umgäng und stoggete mit latärne speeter simmer den vo dr - dsp jg - wieder drennt gloffe. e super idee in täll z'gässle und s bier uff dr stross dringge isch vom e nachtässe gfolgt worde wo an unrueh und heggtig synesgliiche suecht. usa style: bstelle, ässe, zahle, gfelligscht wieder go. s ässe isch zwor nid unschlächt gsii. noch em ässe hämmer e baar rassigi kehr derfe zelebriere wo wieder erwarte sehr guet deent hänn. drno wieder mol en fährifahrt an dr fasnacht ins glaibasel. dr obligati halt im schottekäller mit fascht scho legendäre löämbbe vom hambbe. denn hämmer unseri partnergrubbe wieder droffe. allerdings muess me saage: natel sei dangg sunscht hätte mr könne sueche bis mr schwarz worde wäre. denn isch s ganze langsam ussenander bröösmelet und mir sinn nomol ellei ummezooge, zaichnet vom e harte daag und langsam duure bi root. deent hetts wenn mr ellei gsi sinn, gar nid so iibel, bi erstuunt gsi. jetzt bin i gspannt was dr nei chef dö bisswar für e fiehrigsstiil mitbringt und was die näggscht fasi 2011 an neuem bringt. kinder fasi vilicht? oder gar en alti garde vo dr dsp? wie au immer, ich bi drby und freu mi au scho wieder. (thäggscht: js)

2009 - daggsi sendrale posel2  "never switch from a successfull süschee". noch em grosserfolg us em vorjoor isch relativ schnäll klar gsi, dass mir nomol mit em glyyche süschee an start geen. unseren uffdritt hän mir ussbaut, indäm mir e requisit baschtlet hän - wo hät selle dr taxistandplatz vor de baize symbolisiere. dr peter het kennen e gehhilf mit reedli organisiere, wo umbaut und vom vortraab - merci jürg fir dä kraftaggt - gstosse worden isch. faargescht  het's das joor weniger gha, vermuetlig wäge der rezession, so dass mir `s aigetlige zyyl verbasst hän. - oder isch `s will dr sigi und dr jügge wieder mitgrötzt hän ?!? derfir sin mir als unglaublig soziali fasnachtsgrubbe wohr gno worde - will alli am strooserand gmaint hän, dass mir e gehbehinderete bi uns im vortraab drbii hän... (thäggscht: cv)

2008 - daggsi sendrale posel1 - ändlig wider e mol e süschee mit e bitz mehr diefgang. nach zwai eher schwache joorgäng, 2006 und 2007, isch d'erwaartigshaltig an uns sälber enorm gross gsi. dir sin uss däm grund in dr kischte mit de gueten idee go graabe und hän dert dr gedangge vom en e fasnachtstaxi, wo anderi gribbli vo a nach b duet drummle, gfunde. mit iiberdimensionierte kopfladäärnli - wo gnau glyych ussgseh hän wie die lampe, won e normal taxi au uff em dach hett - hän mir unseri fahrdienst mit grossem erfolg kennen aabiete. ebbe 10 verschiideni grubbe hän mir durch `s fasnachtsgwiehl uff heggschtem musikalischem niveau an `s gwinschte fahrziel grötzt. drummeltechnisch sin mir top gsi - will erschtens dr jügge nid mitgmacht het und zwaitens dr sigi immer no in afrika gsi isch. derfir hän anderi in däm joor der drummel- olymp erraicht... (thäggscht: cv)

2007 nid nomoll charivarie bitte !!
mit däm gschpängscht im nagge hämmer uff die immer üsserscht greatife marschiebige gwaartet. doch au noch 7 kaffi doppelzwätschgen isch an dr schliessimarschiebig nüt berauschends entstande. dr "rettendi" yyphall isch an dr geburtsdagsmarschiebig no dr drummeli derniere ko. i bi allerdings 's gfiehl nid loos worde, as es em willi bi däre bresendazzioon e bitzi uss em rueder gloffen isch. uff dytsch, es isch e bitz dr wurm drinn gsii.
trotz allem isch dä vorschlag denn ussgspiilt worde. under em oberthema "dräggsaurötzer" mit wysse gossdym, wo dr daag duure no hätte verfyyneret wärde selle, mit spyyskartene, glyggezeedel, aromat und maggi, oder ganz eifach mit räppli und orangschedrägg, simmer ab dr harmonie abgloffe. zum glügg han ich dr ganz daag d' lyymspraydoosen und d gläbbandrollen ummedraiht (dasch denn au nümm billig) und bi gar nid derzue ko mini brilliante und gaischtryychen idee uff s aige gossdym z drappiere. trotz em am schluss immer no blutte gossdym hani 's e glungene zyschtig gfunden und deent hetts au ganz nid schlächt. näggscht joor mache mr denn die süscheefindig wieder am donnschtig vor dr fasnacht, wie sichs gheert ! (thäggscht: js)

2006 mr hänn no nyt.........isch nid ebbe s süschee, sondern die blutti wohret. d greatiifabdailig in unsere hirni hett gstreiggt. wie "allefünfjahrewieder" mache mr halt e charivari zyschdig.isch au wieder e mol geil gsii, vorallem s chilli con carne. ( messi tschoppli) mir wänn is uff näggscht joor wieder meh mieh gäh, nid numme drummlerisch, näbbscht epinal und concorde sett denn au wieder e dsp-gossdym lauffe. ps: iibrigens isch dr spruch " das hett doch nyt me mit fasnacht z' due " vo uns reschpeggtiif vo unserem chrigou, au wenn en d deschawüü für ihri deggorazzioon im schnabel missbruucht hänn. das gitt dr näggscht grichtsphall. (thäggscht: js)

2005 - doping schlugger possel e wyttere duurbrenner scho fascht sytt em aafang, isch das süschee vo unserem willi doch immer wieder uss dr versänggig fiiregholt worde. e velohelm vor e grind und e phonak autfit wo allne gangen isch usser unserem fätze, dä isch denn halt als pneulager gloffe. und scho isch wieder isch e dsp joorgang geboore gsi. en idee wo d suva für ihri wärbig uffgschnappt hett und is kei rappe abgitt bis jetzt, wäg de tandieme dien mr denn no prozessiere ;-) (thäggscht: js)

2004 - roy zämme, s tigerzyygli isch uss er e luune uuse an dr herbschtmäss bim ballestand uff dr kasärne entstande. dr sigi hett unbedingt soon e tigerfäll welle und sich halb banggrott bällelet. Nochdäm mir aber denn s adrässzeedeli ab däm voorleeger abgrisse hän, isch s bstelle diräggt ab fabrigg numme no verhandligs gschigg gsii. as dr roy, vo sigfried und roy im spittel um si lääbe kämpft hett, hett uns nid sehr intressiert. mr hätte im schlimmschte fall halt en omaaschzyygli fir ihn druss gmacht. (thäggscht: js)

2003 e quasi neuaafang hän mr brobiert und sin e mol nid am nyyni am schnabel abgloffe. als jackson 12 hän mir dr start in s schieffen egg verleggt. völlig versifft und drnääbe isch das süschee gsi. (thäggscht: js)

2002 als fuessabstreiffer, so richtig trotzig, sin mr wääge de wirren im seibi stamm gloffe. d streifer hän bi uns glaub e schweeri fasnacht gha. e glaine dieffpunggt, noch nyn joor isch das jo au mol z verdraage. (thäggscht: js)

2001 als lampion clique basel mit ebbe sottige larve, wo an jedem halt hänn miesse erneueret wärde, sinn mr als senne gloffe. s erscht mool hett au dr voordraab die glyych figur ussgspiilt. lampion uff e kopf, am richtigen ort auge iinerisse und ab geht die post. sälbstverständligg sinn d hält au wieder zum e glaine event worden und am mittwuch isch no e mängge lampion uff dr route glääge. (thäggscht: js)

2000 isch e ehnder unkreativ joor worde, so hän mir beschlossen im en e charivari z lauffe. fotoshooting vor em stainlemer mit em chrigou gross, sunscht eher unspektakulär. en erscht mool hän mir au mit er en andere grubbe fascht lämbe griegt. d schmalzdaggel, en unhaimligg kreativi senilgrubbe ( wo schyynts d fasnacht erfunde haig, während mir im babbi no am seggel ghange sin ) hett mit ihrem event mit wändverschmiiren und grossaagäh was si alles scho erläbbt haige, definitiv bi uns verspiilt. (thäggscht: js)

1999 hett sich wieder dr chrigou duure gsetzt, mit em e "süschee" wo scho lang under de neegel brennt hett. d zunft zu eerekiibel hett an däre fasi zum en unerwaartete event ussgaartet. im lauf vom daag hett sich nämmlig under den andere fasnächler ummegsprochen as mir zimmlig unkonventionell dääten unseri hält zelebriere. scho bim erschte halt vor em mutz sinn unseri kiibellarve vo de kepf gfloogen und das hett e riise lärm gmacht und anderi grubbierige hän das allemaaschyyn aa luschtig gfunde. (thäggscht: js)

1998 denn scho en eigentligge heehepunggt in dr dsp gschicht, unsere strumpfueli und d fasnachtswält hett is en erscht mool zur kentniss gnoh. dr voordraab isch als elchtescht gloffen und hett si liebi mieh bekundet bim kehr uff em mittelstraife vo dr wettstaibrugg. Ihr wäägeli voll bier hänn si jeedesmol miessen iiber e mittelstreife schleiffe, will wieder e drämmli ko isch. s hett noochär au dämentsprächend gschüümt. (nid dr voordraab, s bier) (thäggscht: js)

1997 hän mr uss ere luune uuse am fryttig vor dr fasnacht, bim börse deggoriere, e süsche erfunde wo mr dr stammbaizer romeo ussgspiilt hänn. mit syyne unvermyydligen und farbige kochbluuse ( zum glügg hett er grad no 12 stügg gha) und em e salaatsiibli mit wäschblätzperugge, em e abwäschbiirschteli als stutzerbärtli, hän mir als romeoglygge 1798 , s 200ste jubileeum gfyyrt. dr gross voordail isch derby gsii, as mer vom anneröös grad zum znacht yyglaade worde sinn, inklusiv gedrängg und kaffi schnaps. sälbstverständligg hänn mr au e kehr mit em romeo als majoor gmacht. s erscht mool hänn mir e veritaable vordraab gha. unseri drei harry hassler hänn ihr eiges süschee ussgspiilt und au ihre eigene erfolg könne verbueche. (thäggscht: js)

e dääwääg missbruucht sin mr s joor 1996 mit neuem elan aagangen und hän wieder neui märsch glehrt. kurz vor dr fasi hän mir denn au no die schyssidee vom and-dreas, als ronald mc donald z lauffen in aagriff gnoh. nummen am moorge, hetts ghaisse. jo bis am mittwuch demoorgen und scho isch die erscht vo vyyle dsp figuren geboore gsi. mir mache jo nid süschees im eigentligge sinn, numme figure mit irgend em e blööde titel derzue. (thäggscht: js)

s joor druff, im 1995, hett d seibi ihr wk süschee ussgspiilt und d dsp isch mit drei pfyffer und eim voordraab versterggt als seibi gloffe. dr jügge als stamm   majoor hett nid derfe mitdrummle ( was nid unbedingt e verluscht gsii isch) und nid alli dsp'ler hänn dörfe mitmache. dr sigi hett miesse dusse blyyben und au  unsere major robi, hett miesse mit synere alte garde mitdrummle. ( das mache mer nie meh, scho elai wäg dr alte garde) (thäggscht: js)

anno 1994 sin mir s erscht mool im en e charivari gloffe, mit em e majoor und 12 dambuure, 12 seibianer und ei gundeli.(thäggscht: js)

... gründet vo e baar mulderötzer, wo mehr als numme d stamm drummelmärsch hän welle rötze! no fuffzäh joor isch das jo au legitim.